Haqqımızda

                   Hələ ötən əsrin 70-ci illərindən Azərbaycana rəhbərlik etdiyi dövrdə bədən tərbiyəsinin, idmanın inkişafına xüsusi diqqət yetirən Ulu Öndər Heydər Əliyev 1994-cü il iyul ayının 26-da Gənclər və İdman Nazirliyinin yaradılmasına dair fərman imzaladı və bununla da , ölkəmizdə idmanın inkişafı üçün ilkin zəmin yarandı.

                   1990-93-cü illərdə ölkəmizdə tənəzzül prosesi getdiyindən Milli Olimpiya Komitəsi də əhatəli işlər görə bilmirdi. 1997-ci ilin iyul ayının 31-də Milli Olimpiya Komitəsinin Baş Məclisinin toplantısında cənab İlham Əliyev Komitənin prezidenti seçildikdən sonra yığılıb qalmış çoxsaylı problemlərin həllinə başlanıldı. İdmanın böhrandan çıxarılması, inkişaf etdirilməsi məqsədi ilə silsilə tədbirlər həyata keçirildi. Ölkəmizdə dünya standartlarına cavab verən çoxsaylı olimpiya-idman mərkəzləri istifadəyə verildi, olimpiya hərəkatı geniş vüsət aldı.

Milli-mədəni gerçəkliyimizin bütün sahələrində olduğu kimi Azərbaycan idmanının müasir intibahının əsasında xalqımızın Ümummilli Lideri Heydər Əliyevin banisi olduğu milli idman strategiyasının Azərbaycan Respublikasının Prezidenti Milli Olimpiya Komitəsinin rəhbəri cənab İlham Əliyevin rəhbərliyi altında ardıcıl və məqsədyönlü şəkildə həyata keçirilməsi durur.
Hər bir ölkədə idmanın kifayət qədər ardıcıl və məqsədyönlü inkişafı idman ənənəsi, idmanla məşğul olmağa şərait və imkan, idmançılara münasibət, idman mütəxəssislərinin yetişdirilməsi, yarışların təşkili və keçirilməsi, idmançıların beynəlxalq yarışlarda iştirakının təmini, idmanın təbliği, kütləviləşdirilməsi kimi amillərdən çox asılıdır. Belə amillər cərgəsində dövlətin idmana münasibəti özünəməxsus yer tutur. Çünki bu münasibət özü-özlüyündə qeyd olunan məsələlərin müəyyən qisminin həllinə bilavasitə təsir göstərir.
Məhz bu baxımdan milli-mənəvi varlığı təhlükə altında olan xalqına rəhbərlik etmək məsuliyyətini üzərinə götürərək bu missiyanın öhdəsindən şərəflə gəlməyə və qısa bir müddət ərzində ölkəsini bölgənin lider dövlətinə çevirməyə qadir olduğunu bütün dünyaya sübut etmiş və hələ sağlığında ikən dünya siyasətinin patriarxı kimi hamı tərəfindən qəbul edilmiş Heydər Əliyevin Azərbaycan idmanının inkişafı sahəsindəki xidmətləri mühüm olduğu qədər böyük, faydalı olduğu qədər danılmazdır.