Arena Polo üzrə VI Dünya Kuboku turnirinin final mərhələsi keçirilib


       Heydər Əliyev Fondunun dəstəyi və Azərbaycan Respublikası Atçılıq Federasiyasının təçkilatçılığı ilə Azərbaycan Xalq Cümhuriyyətinin yaradılmasının 100 illik yubileyinə həsr  olunmuş Milli Atçılıq Festivalına 17 iyun 2018-ci il tarixdə artıq 6-cı dəfə keçirilən Arena Polo üzrə Dünya Kuboku turnirinin final yarışı ilə yekun vurulub.

Qeyd edək ki, Milli Atçılıq Festivalı çərçivəsində keçirilən Arena Polo üzrə VI Dünya Kuboku turniri Dahi Öndər Heydər Əliyevin 95 illik yubileyinə, Azərbaycan dövlətçiliyini xilas etməsinin 25-ci ildönümünə həsr olunmuşdur.

Tədbirin əvvəlində may ayında Böyük Britaniyanın və Şimali İrlandiyanın kraliçası 2-ci Elizabetin şərəfinə Londonda  təşkil olunmuş  “Vindzor Kral At Şousu”nda Qarabağ atları ilə möhtəşəm çıxış ifa edən Sərhədçi “Süvarilər” dəstəsi “Azərbaycan şou” su nümayiş ediblər.

Günün ilk oyununda  Indian Polo & Riding Club New Delhi (Bot) və  Polo Club Wicklow (Palladium) üçüncülük uğrunda mübarizə aparıb. Oyun 7:4 xal hesabı ilə Hindistan komandasının xeyrinə başa çatıb və komanda Arena Polo üzrə Dünya kubokunda bürünc medal qazanıb.

Final isə Elite Horse & Polo Club (Pasha bank) və Rhein Polo Club Düsseldorf (Altun 97) arasında baş tutub. Son dərəcə gərgin keçən idman mübarizəsi şəraitində yarışın və kubokun qalibi son saniyələrdə vurduqları qol hesabına 7-6 xal hesabı ilə  Almaniya Polo komandası olub. Vətənimizi təmsil edən Elite Horse & Polo Club (Pasha bank) komandası isə ikinci yerdə qərarlaşaraq gümüş medala layiq görülüb. Qaliblərə mükafatlarını Azərbaycan Respublikası Atçılıq Federasiyasının Prezidenti Elçin Quliyev təqdim edib.